Messagg mill-Onor. Ministru ta' l-Edukazzjoni, Kultura, Żgħażagħ u Sport
L-Onor Dolores Cristina

Għeżież Tfal

Nilqagħkom għal Skolasajf ta' din is-sena. Nittama li nsib ħin biex matul is-sajf niġi nżurkom fiċ-ċentri fejn tkunu.

Nixtieq li matul Skolasajf, flimkien ma' l-għalliema u l-istudenti li se jkunu magħkom, titgħallmu ssiru tħobbu aktar l-affarijiet li huma tagħna l-Maltin. Kif nitkellmu, kif nilagħbu, kif nieklu, kif nilbsu u affarijiet oħra li flimkien huma parti mill-kultura tagħna. U titgħallmu wkoll li kull pajjiż għandu l-kultura tiegħu li tista' tkun tixbaħ dik ta' pajjiż ieħor u tista' tkun differenti ħafna minn tagħna.

Din is-sena hi sena li matulha qed infakkru li fl-Ewropa, li Malta hi parti minnha, hawn ħafna kulturi differenti. U allura se jkollkom iċ-ċans taraw kif tfal f'pajjiżi oħra, jgħixu b'mod differenti minna, għandhom drawwiet li mhux bħal tagħna, għandhom mużika u żfin li huma differenti minn tagħna.

Skolasajf ma nagħmluhiex biex il-ġenituri tagħkom joqogħdu bi kwiethom id-dar. Nagħmluha biex nagħtukom opportunita tiltaqgħu ma' ħbieb ta' l-eta tagħkom, titgħallmu magħhom, tilagħbu magħhom, taqsmu l-affarijiet magħhom u ssiru tafu dwar tfal oħra f'pajjiżi oħra.

Narakom hemm

Dolores Cristina
Ministru ta' l-Edukazzjoni,
Zgħazagħ, Kultura u Sport

Ghall-attenzjoni tieghek

Jiġu aċċettati tfal skond il-postijiet fl-iskejjel/centri fuq bazi ta' min japplika l-ewwel. L-applikazzjonijiet jibqgħu jintlaqgħu sa nħar il-Ġimgħa, 6 ta' Ġunju, 2008.

Skolasajf 2008 se tibda nhar it-Tnejn, 14 ta' Lulju u tibqa' sejra sa nhar il-Ġimgħa 15 ta' Settembru - kuljum bejn id-9:00 a.m. u 12:00 p.m.

Isir ħlas ta' €11.50 għal kull tifel/tifla mar-Reġistrazzjoni. Spejjez konnessi ma' ħruġ mhumiex inkluzi.